Si Halangdong Gobernador Aurora Enerio-Cerilles ang nagkanayon nga “susama sa atong Zamboanga del Sur Provincial Hospital nga atoang gipaningkamotan ma-improve o ma-rehabilitate, ang Aurora General Hospital usab nanginahanglan sa maong pagtagad”. Iyang gidugang sa pagpamahayag, “tungod kay dugay-dugay na ang naasoy nga hospital kinahanglan na gayud ang igong pagtagad busa pinaagi niini, ako naninguha sa paggahin ug pondo alang sa katumanan niini.” Dili ikalimod nga si Gob. Cerilles ang naningkamot gayud sa mga susama nga mga proyekto tungod kay kini nahilakip man sa iyang 7-Point Agenda nga maoy giya sa iyang pagserbisyo ngadto sa katawhan ning atong probinsya.

Karon dako nga gikapasigarbo ang bag-ohay pa lamang nahuman pag renovate nga Aurora General Hospital aron mapalapadan ang paghatag sa serbisyo alang sa katawhan sa lungsod sa Aurora ug sa kasigpit nga mga dapit.

Mapasalamaton kaayo si Dr. Samaon Tapodoc, ang Hepe sa Aurora General Hospital sa mga paningkamot ni Gobernador Cerilles tungod kay gumikan niini, natubag na gayud ang dugay na nga gihandum nga pag-repair sa maong hospital.