Ang Office of Presidential Adviser on Peace Process (OPPAP) pinaagi ni Director Diosita “Jojo” Andot nagkanayon nga adunay maayong mga resulta ang maong exploratory talks. Usa niini ang pagresolbar sa isyu sa pagpadayon sa pormal nga kasabutan alang sa malahutayong kalinaw sa Mindanao. Dugang pa, gikasabutan usab ang pagpadala sa usa ka independent survey team gikan sa nasud sa Malaysia dinhi sa Pilipinas -- ang gitahasan nga magalangkob sa International Monitoring Team (IMT) aron maoy molantaw sa pag-implementar sa kasabutan samtang magapadayon ang panagsabot.

Niini, gilantaw sa mga kadagkuan sa GRP ug MILF panel ang mahayag nga ugma sa nasud. Gani gipangandaman sa pagkakaron ang hapsay nga pag-anhi sa IMT kay sila gituohan nga lig-on nga instrumento nga atong madani ang mga donor countries ug organizations sama sa Malaysian Technical Cooperation Program (MTCP), USAID, ug uban pa nga andam motabang alang sa kalambuan sa mga gitawag ug “conflict affected areas”. Ang IMT sa pagkakaron, nakita nga usa gayud ka maayong pamaagi aron mahatagan ug kalambuan ang mga apektadong lugar.

Dugang pa, ang GRP ug MILF panel ang nagsabot sa pagmugna ug Provincial Local Monitoring Team (PLMT) sa trese (13) ka mga probinsiya sa Mindanao nga apektado sa panagbangi tali sa GRP ug MILF. Ang PLMT adunay lima ka mga membro matag probinsya ug ang pagmugna niini base sa balanse nga representasyon sa mga miyembro sa GRP ug MILF.

Dinhi sa atong lalawigan , adunay duha ka membro ang nagrepresentar sa GRP samtang duha usab sa MILF panel ug usa gikan sa religious sector. Ang PLMT sa probinsiya sa Zamboanga del Sur ang kasamtangang gipanguluhan sa atong Halangdong Gobernador Auring Enerio-Cerilles.

Sumala sa gikasabutan sa GRP-MILF Panel, ang PLMT mao ang responsable sa pagmonitor sa kahusay ug kalinaw sa probinsiya ug magpugong sa pagpukaw sa panag-away tali sa GRP pinaagi sa mga kasundaluan niini ug sa MILF -- ang mga combatant forces niini. Apil sa maong responsibilidad, mao ang paghimo ug fact finding investigation kon ugaling aduna may mga panghitabo nga panagbangi tali sa duha ka mga grupo.
Niini, gustong ipaabot ni Gobernadora Auring Cerilles isip Chairman sa PLMT niining lalawigan ang iyang seryoso ug kinasingkasing nga paningkamot alang sa lintunganay nga kalinaw dinhi sa Mindanao, ilabi na dinhi sa atong probinsya.

“Mas dali nga makab-ot ang atong gilantaw nga kalinaw kon molihok kitang tanan alang niini, busa ako magahangyo sa mga katawhan sa Zamboanga del Sur nga mahimong mabinantayon sa unsa man nga mga kasamok ug motaho dayon sa akong buhatan,ilabi na gayud ang inyong masigpatan nga panagbangi tali sa sundalo sa kagamhanan ug mga combatants sa MILF.