Ang suporta sa administrasyon makita pinaagi sa mga “field workers” nga maoy nag-monitor sa dagan sa mga natanum nga mga cassava maingon man sa mga agricultural technicians nga maoy nagatudlo sa “basic information and tips on cassava planting.” Tungod sa maayong panglantaw sa lokal nga kagamhanan alang sa dugang panginabuhian, mapasalamaton ang mga mag-uuma nga sa pagka-karon nga nagkugi ug padayon nga nananum sa kamoteng kahoy.

Dugang nga suporta, mao ang pagkatukod sa duha ka mga kooperatiba nga nagserbisyo sa duha ka distrito niining lalawigan -- ang Malindang Planters Multi-Purpose Cooperative sa Distrito I ug Baganian Planters Multi-Purpose Cooperative sa District II. Nagtabang ang nasangpit nga mga kooperatiba sa mga mag-uuma nga nananom ug kamanting isip mga membro. Tumong sa pagtabang, nila mao ang kabahin sa “cassava production” ug ang posible nga pagtubag sa ilang mga panginahanglanon.

Ingon nga “program accomplishment”, ning bag-ohay pa lamang, mokabat sa 1,404,587.73 ka kilo nga binangkol ang nabaligya ngadto sa San Miguel Corporation. Adunay existing Memorandum of Agreement (MOA) tali sa probinsya ug sa maong korporasyon. Busa, ang San Miguel Corporation maoy mopalit sa mga abot sa cassava planters nga dili mokubos sa PhP 2.50 ang matag kilo sa cassava chips.

Lakip niini, midason sa pagbalita ang mga cassava planters nga dako kaayo kini ug ikatabang sa ilang kalisod kay ang kapital nga PhP 300.00 sa ilang pagpananom ug kamanting, mokita kini ug PhP 23,000 to 30,000 sulod sa siyam ka bulan (panahon sa ilang pagbangkol).

Sa pagkakaron, ang mga “tubers” sa kamanting kahoy paliton ug Php1.00 isip straight price ug ang cassava chips sa presyo nga PhP 2.80 ang matag kilo.
Dinhi makita nga ang kasamtangang administrasyon nagalantaw sa pag-usbong sa kinitaan sa atong mga igsoong mag-uuma.